Выстаўка “САЛІГОРСКІЯ МАЙСТРЫ”

3 красавіка (серада) 2024 года а 17 гадзіне ў мастацкай галерэі ДУ «Мінскі абласны цэнтр народнай творчасці»
мае адбыцца адкрыццё выстаўкі “САЛІГОРСКІЯ МАЙСТРЫ”

Мінскім абласным цэнтрам народнай творчасці ў межах мерапрыемстваў па захаванню нацыянальна-культурнай самабытнасці і традыцый арганізавана выстаўка “Салігорскія майстры”, якая прэзентуе творчасць носьбітаў і захавальнікаў традыцыйнай мастацкай культуры, якія жывуць у Салігорскім раёне Мінскай вобласці і з’яўляюцца сябрамі Грамадскага аб’яднання “Беларускі саюз майстроў народнай творчасці”. Традыцыйнае мастацтва і народныя рамёствы — важная частка сучаснага культурнага жыцця краіны. “Салігорскія майстры” дэманструюць актуальную аўтарскую інтэрпрэтацыю сапраўдных брэндаў беларускага мастацтва — маляваных дываноў, керамічнага посуду, саламяных павукоў, дэкаратыўнай анімалістычнай і антрапаморфнай скульптуры з саломкі, тканых посцілак і інш.

Экспазіцыя складацца з сучасных вырабаў дэкаратыўна-прыкладнога мастацтва, выкананых ў народных традыцыях і тэхналогіях. Гледачу прадстаўлены кераміка (ганчарная і дробная пластыка), саломапляценне, ткацтва, вышыўка, роспіс па шкле, маляваныя дываны.

У зале галерэі “Цэнтр” паказана творчасць 14 майстроў, тры з якіх маюць ганаровы статус “народны майстар Рэспублікі Беларусь”.

Асобным раздзелам выстаўкі з’яўляецца своеасаблівая творчая справаздача навучэнцаў Заслужанага любіцельскага калектыву Рэспублікі Беларусь студыі дэкаратыўна-прыкладной творчасці “Скарбонка” Цэнтра творчасці дзяцей і моладзі Салігорскага раёну, г. Салігорск і яе кіраўніка народнага майстра Мікалая Аляксеевіча Пратасені прымеркаваная да 40-годдзя студыі. На працягу дзесяцігоддзяў Мікалай Аляксеевіч перадае дзецям і моладзі самабытныя тэхналогіі народных мастацкіх промыслаў, навучае і натхняе маладое пакаленне на творчасць. У экспазіцыі можна ўбачыць керамічныя вырабы амаль 30 навучэнцаў розных год. Таксама экспазіцыя распавядае пра яшчэ пра адзін творчы бок кіраўніка студыі — яго захапленне фотамастацтвам.

Выстава працуе з 3 красавіка па 28 красавіка 2024 г.

Месца правядзення: мастацкая галерэя «Цэнтр» ДУ «Мінскі абласны цэнтр народнай творчасці»

Адрас: Мінск, вул. Гікалы, 4

Час працы: серада-нядзеля: 11:00 — 19:00

Тэл. 8017 342 50 76              @gallery_centre

Кошт уваходнага білета – 3 руб., студэнцкага, дзіцячага, ільготнага білета – 1 руб.