З 22 снежня 2021 па 17 студзеня 2022 года ў выставачнай зале дзяржаўнай установы «Мінскі абласны цэнтр народнай творчасці» (г. Мінск, Гікалы, 4) будзе праходзіць выстаўка «Калядныя ўзоры»
«Калядныя ўзоры» – выстаўка, якую ўжо ў 29 раз ладзіць грамадскае аб’яднанне «Беларускі саюз майстроў народнай творчасці». У выстаўцы бяруць удзел больш за 100 творцаў з усіх рэгіёнаў Беларусі. Старажытныя традыцыі беларускага народнага мастацтва, якія працягваюць сучасныя майстры, прадстаўлены ў разнастайных тэхніках і матэрыялах: мастацкая апрацоўка дрэва, ганчарства, коўка, вышыўка і ткацтва, карункапляценне, апрацоўка скуры, пляценне з прыродных матэрыялаў, роспіс па дрэве, палатне і шкле, выцінанка і многае іншае.
Асабліва карыснай выстаўка будзе для дзяцей і юнацтва, бо дазволіць маладым людзям дакрануцца да духоўнай спадчыны, убачыць багацце творчых рашэнняў, тэхнічную дасканаласць і шматфункцыянальнасць традыцыйнага беларускага дэкаратыўна-прыкладнога мастацтва.
На час экспанавання выставы запланаваны майстар-класы па стварэнні цацак з саломкі і паштовак з выцінанкай для тых, хто хоча бліжэй пазнаёміцца з вырабам традыцыйных мастацкіх твораў і паспрабаваць зрабіць калядны сувенір сваімі рукамі.
Выставачная зала працуе ў сераду-нядзелю з 11.00 да 19.00.
Кошт уваходнага білета – 2 руб., ільготнага білета – 1,5 руб.
Даведкі па тэлефоне 8017 342 50 76.
